Қиличбозларимизнинг йиғини давом этмоқда

Жумладан, шпага ва сабля йўналишлари бўйича терма жамоамиз Тошкент шаҳридаги «Умид» ва рапирачилар эса Миллий қиличбозлик клуби залида кунига икки маҳалдан ўқув-машғулотлар йиғинини ўтказишмоқда.

Ўзбекистон қиличбозлик федерацияси матбуот хизматининг маълум қилишича, шифокор Сардор Садиков спортчиларнинг соғлигини доимий равишда назорат қилиб боряпти. Йиғинда барча карантин қоидаларига риоя қилинмоқда.

- Мазкур йиғин олдинда бўлиб ўтадиган республикамиз миқёсидаги мусобақалар ҳамда Осиё ва жаҳон чемпионати, шунинг жаҳон кубоги ва бошқа халқаро турнирларга сифатли ва пухта тайёргарлик босқичи вазифасини ўтаб беради - дейди қиличбозлик бўйича миллий терма жамоамизнинг сабля йўналиши бўйича мураббийи Ёрқин Йўлдошев. – Узоқ танаффусдан сўнг ташкил этилган ушбу йиғинда асосан қиличбозларимизнинг жисмоний формасини тиклаш ва уларнинг психологик ҳолатларидан келиб чиқиб, ғалаба сари руҳлантиришга алоҳида эътибор қаратилмоқда.

Машғулотларни кузатар эканмиз, спортчиларнинг мураббийлари кўрсатмаларини аъло кайфиятда бажараётганликларини гувоҳи бўлдик.

Маълумот учун, қиличбозлик бўйича ўқув-машғулотлар йиғини 31 октябрга қадар давом этади.