Қиличбозлик. Яна Алборова жаҳон чемпионатини ғалаба билан бошлади, қолганлар эса...

Беллашувларда ўзбекистонлик қиличбозлар ҳам иштирок этишмоқда. Кеча 4 нафар ҳамюртимиз стартга чиқди. 

Аёллар ўртасида шпага баҳсларида қатнашган Малика Ҳакимова саралаш босқичида (пулька) учта ғалабага эришиб, асосий даврага йўл олди. Асосий даврада у аввалига Сингапур, кейин эса Руминия вакиласини мағлуб этди. Энди ҳамюртимиз 1/32 финалга чиқиш учун хитойлик рақибасига қарши жанг қилади. Эркаклар ўртасида сабля баҳсларида эса Пазилбек Генжебаев ва Бобиржон Расулов пулькада яхши иштирок этишди ва асосий даврага йўл олишди. Афсуски, Пазилбек илк даврада ҳиндистонлик рақибига 14:15, Бобиржон эса Сингапур вакилига 13:15 ҳисобида ютқазиб қўйди. Шерзод Мамутов эса саралаш гуруҳидаёқ ютқазиб қўйди. 

Бугун аёллар ўртасида рапира, эркаклар ўртасида шпага баҳслари ўтказилмоқда. Яқинда терма жамоамизга жалб этилган рапирачи Яна Алборова саралаш босқичини жуда яхши ўтказди ва биринчи ўрин билан асосий даврага йўл олди. Асосий даврадаги илк жангида Яна Чили вакиласи Катина Проестакисни 15:14 ҳисобида мағлуб этди. Энди у иккинчи даврада франциялик Солен Бутрюильга қарши жанг қилади. 

Шпагагачи йигитларимиз эса ҳозирча пулька жангларини ўтказишмоқда.