Қойил! Ҳумоюн Султонов бир ҳафта ичида ўзи иштирок этган иккинчи мусобақанинг финалига йўл олди!

Ушбу мусобақада муваффақиятли одимлаётган Ҳумоюн Султонов финал чиптасини ҳал қилди. Ҳамюртимиз уч сет давом этган 1/2 финал баҳсида камбэк қила олди. У бироз аввал якунига етган ва 2 соату 22 дақиқа давом этган учрашувда австриялик Сандро Коппни 3/6, 7/6(4), 6/1 ҳисобларида доғда қолдирди.

Таққослаш учун, Султонов дунё рейтингида 367, Копп эса 480-ўринни эгаллаб турибди. Ҳумоюн турнирда 5, Сандро 7-рақам остида таснифланган. Бу теннисчиларнинг ўзаро иккинчи учрашуви эди. Ўтган йили 31 май куни ўтказилган илк тўқнашувда ҳам Султонов ғалаба қозонганди. 

Эртага мамлакатимизнинг биринчи ракеткаси Доҳа турнири бош соврини учун туркиялик Эрги Киркинга қарши кортга чиқади. Турнирнинг учинчи ракеткаси бўлган Кирин бугун 1/2 финалда британиялик Али Ҳабибдан 6/4, 6/4 ҳисобларида устун келди. Эрги ATP рейтингида 340-ўринни эгаллаб турибди.

Қайд этиш жоиз, Ҳумоюн Султонов 14 январь куни Доҳадаги M15 мусобақаси чемпионига айланган эди. У 14 та ўйиндан буён ғалаба қозониб келмоқда. Ушбу турнирнинг мукофот жамғармаси 25 000 АҚШ долларини ташкил қилади.