15 янв 08:11
Янгиликлар

Бокс/ММА

Расман. Жошуа - Паркер жанги санаси ва манзили маълум

Ниҳоят, профессионал бокснинг супероғир вазн тоифасида узоқ кутилган бирлаштирувчи чемпионлик жанги санаси ва манзилига расман ойдинлик киритилди.

Унга кўра, ушбу чемпионлик жанги 31 март куни Уэльснинг Кардифф шаҳридаги “Миллениум” стадионида ўтказилади. Бу маълумотни Энтони Жошуа (20-0, 20 КО) ва Жозеф Паркер (24-0, 18 КО)нинг расмий вакиллари ҳам тасдиқлашди.

Британиялик Жошуа ҳозирда WBA, IBF ва IBO йўналишлари чемпиони бўлиб турибди. Янги Зеландия боксчисида эса WBO чемпионлик камари бор. Бу Энтони учун Уэльс пойтахтида ўтказиладиган иккинчи жанг бўлади. У ўтган йилнинг 28 октябрь куни Карлос Такамни 10-раундда мағлуб этган эди.

Ўз ўрнида Паркер ҳам Буюк Британия ҳудудида ўзининг иккинчи жангида рингга кўтарилади. 2017 йилнинг сентябрь ойида у Манчестер шаҳрида WBO чемпионлик камарини мезбон боксчи Хьюи Фьюридан ҳимоя қилганди.