Расман. Қудратилло Абдуқаҳҳоровнинг рақиби ва жанг санаси маълум

Яқиндаги WBC Silver чемпионлик камаридан воз кечган чарм қўлқоп устамиз энди ярим ўрта вазн тоифасида IBF чемпионлик камари учун жанг қилади. 25 ёшли Абдуқаҳҳоров япониялик 31 ёшли боксчи Кеита Обарага қарши рингга кўтарилади. 

Қудратилло IBF рейтингида 4-ўринни эгаллаб турибди, Обара эса 6-поғонадан жой олган. Жанг ғолиби рейтингда биринчи ўринга кўтарилиб олади ва ушбу вазн тоифасида IBF чемпиони Эррол Спенсга қарши рингга кўтарилиш ҳуқуқини қўлга киритади. Абдуқаҳҳоров - Обара саралаш жанги 5 январь куни Малайзияда бўлиб ўтади. 

Маълумот учун, Қудратилло Абдуқаҳҳоров (15-0, 9 KOs) профессионал боксдаги фаолияти давомида 15та жанг ўтказиб, уларнинг барчасида ғалаба қозонган. Тўққизта жангда рақибларини нокаутга учратган. 

Обара эса проф боксдаги 12 йиллик фаолияти давомида 24та жанг ўтказган бўлиб, уларнинг 20тасида ғалаба қозонган. Ўн саккизта жангда рақибларини нокаутга учратган. Учта жангда мағлубиятга учраган ва эътиборлиси барчасида нокаутни қабул қилиб олган. Битта жанг дуранг билан якунланган.