Реванш бекор қилинса, Головкин ва Альварес миллионларни бой беришади

Бунга Альвареснинг қон таркибида таъқиқланган модда аниқлангани сабаб бўлмоқда. Невада штатининг Атлетик комиссияси Сауль “Канело”ни вақтинчалик четлатди. Якуни қарор 10 апрель куни қабул қилинади. 

Агар реванш жанги ҳақиқатан ҳам бекор қилинса, иккала боксчи катта миқдорда молиявий зарар кўришади. Дуранг натижа билан якунланган илк жангда мексикалик боксчи 5 миллион, Головкин эса 3 миллион доллар гонорар олганди. 

Бу фақат боксчиларга ваъда қилинган ва кафолатланган гонорар суммалари. Бундан ташқари, трансляциялар сотувидан 1,3 миллион, чипталар сотувидан эса 27,06 миллион доллар даромад кўрилган. 

Бу бокс тарихидаги учинчи натижа ҳисобланади. Ана шу тушумлардан олинадиган улушни ҳам қўшиб ҳисобласак, Головкин ва Альварес яна бир неча миллионга эга бўлишади. Реванш жангида бу сумма яна ҳам кўпроқ бўлиши аниқ. Шу боис, реваншнинг бекор қилинишидан боксчилар ва уларнинг промоутерлари манфаатдор эмаслар.