Роберто Де Дзерби "Марсель"ни тарк этишга қарор қилди

Машҳур журналист ва инсайдер Фабрицио Романо ижтимоий тармоқдаги X саҳифасида италиялик мураббий Роберто Де Дзерби Франциянинг "Марсель" клуби раҳбарияти билан ҳамкорликни муддатидан олдин тўхтатиш бўйича келишувга эришганини маълум қилди. Яқин вақт ичида мутахассиснинг истеъфоси расман эълон қилиниши кутилмоқда. Қайд этилишича, жамоанинг еврокубоклар ва миллий чемпионатдаги муваффақиятсиз натижалари ортидан кетиш қарори айнан Де Дзербининг ташаббуси билан қабул қилинган. Манбага кўра, 46 ёшли мураббий қониқарсиз натижалар сабаб лавозимидан озод этилишини сўраган.

Де Дзерби бошқарувида "Марсель" Чемпионлар лигаси умумий босқичини 25-ўринда якунлаб, мусобақа плей-офф босқичига йўллана олмади. Франция чемпионатида эса провансликлар 21 турдан сўнг 39 очко жамғариб, турнир жадвалида тўртинчи ўринда бормоқда. Сўнгги турда Де Дзерби шогирдлари Лига 1 пешқадами ПСЖга 0:5 ҳисобида мағлуб бўлган эди.