Roland Garros. Бугун Истомин - Федерер баҳси. 8-тўқнашувда ким ғолиб бўлади? Тарихий учрашув олдидан ПРЕВЬЮ

Кеча "Катта Дубулға" туркумига кирувчи мавсумнинг иккинчи мусобақаси асосий тўр баҳсларига старт берилди. Мамлакатимизнинг биринчи ракеткаси Денис Истомин саралаш баҳсларидан муваффақиятли ўтиб, 2018 йилдан бери илк бор ушбу турнирнинг асосий даврасига йўл олганди. 

Бугун у асосий тўрнинг биринчи даврасидаёқ теннис афсонаси Рожер Федерерга қарши кортга чиқади. Шу пайтгача Истомин ва Федерер ўзаро 7 бор тўқнаш келган ва ушбу баҳсларнинг барчасида швейцариялик теннисчининг қўли баланд келган. Илк марта теннисчилар 2006 йил Australian Open мусобқасининг биринчи босқичида учрашишган бўлса, 2019 йил айнан шу мусобақада ва яна илк даврада уларнинг йўллари ҳозиргача сўнгги бор кесишган. Бугунги бўлиб ўтадиган асосий тўрдаги учрашув икки теннисчининг фаолиятидаги ўзаро 8-ўйин бўлади.

Федерер охирги 10 учрашувида нечта ғалабага эришган?

Рожер Федерер ўтказган охирги 10 учрашувидан 6 тасида ғалаба қозонган. Жорий 2021 йилги мавсумда Федерер 3 бор кортга чиқди. 2020 йил бошида Australian Open турнирдан сўнг Рожер жароҳати туфайли фаолиятида катта танаффус қилди. Шундан сўнг, 2021 йилда Дохадаги турнирда мавсумдаги илк ўйинини ўтказди. Бугун "Ролан Гаррос" турнирида илк учрашувини ўтказадиган Рожер Федерер турнирнинг 8-ракеткаси бўлиб сараланган.

Истоминнинг охирги 10 ўйиндаги натижаси қандай?

Денис Истомин ҳам ўтказган охирги 10 учрашувидан 6 тасида ғалаба қозонган. Шулардан учтаси айнан "Ролан Гаррос"нинг саралаш баҳсларига тўғри келади. Саралаш баҳсларида Истомин аввалига Босния ва Герцоговина вакили Дамир Жумхурга қарши кортга чиқиб, рақибини 2/6,6/2, 6/1 ҳисобларида мағлуб этди. Иккинчи босқичда эса ҳиндистонлик Рамкумар Раманатхан билан тўқнаш келди ва 6/1, 6/2 ҳисобларидаги ғалабани тантана қилди. Саралашнинг финал босқичида Истомин жаҳон рейтингида 239-ўринда бораётган германиялик Тобиас Камкедан икки сетда 6/4, 7/6 ҳисобларида устун келди ва фаолиятида еттинчи бор "Ролан Гаррос"нинг асосий тўрида иштирок этиш ҳуқуқини қўлга киритди. 

Маълумот учун, айни пайтда Денис жаҳон рейтингида 203, Рожер эса 8-поғонани эгаллаб турибди. Истоминда теннис афсонасини илк бор мағлуб этиш имконияти мавжуд. Федерер эса ушбу турнирда чемпионликка даъвогар эмаслигини таъкидлаб ўтди. Демак, бугун қизиқарли баҳс гувоҳига айланамиз деган умиддамиз. 

Денис Истомин - Рожер Федерер учрашуви бугун Тошкент вақти билан соат 19:00да бошланиши белгилаб қўйилган. 

Olamsport.com сайти Денис Истоминга омад тилайди.

Хуршида Абдикулова тайёрлади