Роналду, Гризманн ва Месси - Йил футболчиси бўлишга даъвогар

Криштиану Роналду, Антуан Гризманн ва Лионель Мессидан бири 2016 йилнинг энг яхши футболчиси деб топилади. Бу учликда мукофот учун энг муносиб номзод бу шубҳасиз, Криштиану Роналду бўлиб турибди.

Роналду Португалия терма жамоаси билан бирга Францияда ўтган Европа чемпионатида ғолиб чиқди. Клублар ўртасидаги энг нуфузли мусобақа - Европа чемпионлар лигасида ҳам бош мукофотни қўлга киритди.

Криштиану бу йил ҳисобида ҳозирча 53та гол киритиб, 17та голга ассистентлик қилди.

Иккинчи номзод - Антуан Гризманн. Мадриднинг “Атлетико” клуби ҳужумчиси Европа чемпионатининг энг яхши футболчиси деб топилганди. Шунингдек, у тўпурарлик маҳоратини ҳам намойиш этган эди.

Учинчи номзод - Лионель Мессининг имкониятлари энг кам баҳоланяпти. Аргентиналик футболчи “Барселона” сафида Испания чемпиони ва мамлакат кубоги соҳиби бўлган. 2016 йилда Месси ҳозирча 55та гол уриб, 32та голга ҳаммуаллифлик қилган.