Самбо бўйича Ўзбекистон чемпионати бошланмоқда: ассоциация вакиллари Урганчда

Шу муносабат билан, Ўзбекистон самбо ассоциацияси бош котиби ва бош мураббийи Роман Шакиров, раис ўринбосари Ислом Адилов, аёллар терма жамоаси катта мураббийи Екатерина Близнецова мусобақа ўтказиладиган Урганч шаҳрига етиб боришган. 

Ассоциация мутасаддилари бугун Урганчдаги самбо залларида бўлишди. Уларга Ўзбек самбосининг афсоналаридан бири Раҳим Машарипов, шунингдек самбо бўйича Хоразм вилояти терма жамоаси катта мураббийи Зафар Аллаберганов ҳамрохлик қилишди. 

Мутасаддилар у ерда самбо тўгараклари мавжуд бўлган спорт заллари - Яккакурашлар мактаби ва "Динамо" спорт залида бўлишди. У ерда ёш самбочилар билан суҳбатлашишди, тегишли тавсия ва маслаҳатлар берилди. Спортчиларга олдинда турган мусобақа омад тиланди. 

Шунингдек, Раҳим Машарипов ёш полвонларга Хоразм вилояти самбо мактаби ҳақида гапириб берди. 

Эслатиб ўтамиз, бугун Ўзбекистон чемпионатининг ташкилий масалалари ҳал қилинади. Асосий беллашувлар 1 ва 2 апрель куни бўлиб ўтади. Баҳслар 2004 ва 2005 йилларда туғилган, хамда фахрий спортчилар ўртасида ўтказилади.

Ўзбекистон самбо ассоциацияси матбуот хизмати