Санкт-Петербург Губернатори кубоги. Биринчи кун битта ғалаба, икки мағлубият ФОТО

Кеча “Санкт-Петербург Губернатори кубоги”нинг илк кунида уч нафар чарм қўлқоп устамиз рингга кўтарилди. Боксчиларимиз иштирокини -60 кг вазн тоифасидаги вакилимиз Отабек Холматов бошлаб берди. У маврикилик Дамиен Хелленени 5:0 (30:27, 30:27, 30:27, 30:27, 30:27,) ҳисобида мағлубиятга учратди. 

Шундан сўнг -64 кг вазн тоифасида юртимиз шарафини ҳимоя қилган Зоиржон Жуманазаров бразилиялик Оливейра Вандерсонга қарши рингга чиқди. Тенг курашлар остида кечган жангда ҳакамлар ғалабани Вандерсонга тақдим этишди - 1:4 (28:29, 29:28, 28:29, 27:30, 28:29). 

Боксчиларимизнинг кечаги иштирокини +91 кг вазн тоифасидаги юртдошимиз Обиджон Тоҳиров якунлаб берди. У озарбайжонлик Магомед Абдуллаевга қарши рингга кўтарилди. Қизиқарли кечган жанг якунида ҳакамлар 3:2 (30:27, 30:27, 30:27, 28:29, 28:29) ҳисобидаги ғалабани озар боксчисига беришди. Россиялик уч ҳакам жангда Магомед, Мўғулистон ва мексикалик ҳакамлар эса Обиджон ғалаба қозонганини қайд этишган.