"Севилья" "Олд Траффорд"да "МЮ"ни мағлуб этиб, чорак финалга чиқди

Испанияда ўтган биринчи баҳсда ҳисоб очилмагач, кўпчилик манчестерликларнинг жавоб ўйинида имкониятини юқори баҳолаётган эди. Бироқ майдонда ҳаммаси бошқача бўлиб чиқди. Биринчи бўлимда ҳисоб очилмаган бўлсада, "Севилья" сафида Бен Йеддернинг майдонга тушиши ўйин тақдирини ўзгартириб юборди. 

27 ёшли француз ҳужумчиси майдонга тушганига ҳеч қанча ўтмай Давид Де Хеани доғда қолдирди. Бироз ўтиб айнан унинг боши билан берган зарбаси манчестерликларни икки бор ўйинни майдон марказидан бошлашга мажбур этди.

84-дақиқада Лукаку бурчакдан узатилган тўпни "Севилья" дарвозасига киритган бўлсада, қолган вақт давомида "қизил иблислар" рақиб дарвозасига йўл топа олишмади. Натижада сафарда 2:1 ҳисобида ғолиб чиққан испанлар ҳақли равишда ЕЧЛнинг чорак финалига йўл олишди.