Шарофиддиннинг "ОЛТИН"и эвазига 4-ўринга кўтарилдик + ФОТО

Кечаги кун Ўзбекистон терма жамоаси учун омадли келди. -81 кг вазн тоифасида юртимиз шарафини ҳимоя қилган дзюдочимиз Шарофиддин Болтабоев барча рақибларини мағлубиятга учратган ҳолда Тель-Авив "Катта Дубулға" турнири чемпионига айланди. Ушбу ғалаба Шарофиддинга олтин медаль билан бирга Токио Олимпиадаси йўлидаги жуда ҳам қимматли бўлган 700 рейтинг очкосини ҳам тақдим этди. 

Болтабоевнинг олтини сабаб Ўзбекистон терма жамоаси медаллар жамғариш бўйича умумжамоа ҳисобида 10-поғонадан 4-ўринга кўтарилиб олди. Ҳисобимизда 1 та олтин, 2 та бронза медали бор. Иккита олтин, 1 та кумуш, 1 та бронза медалига эга Франция терма жамоаси биринчи поғонадан жой олган. Исроил терма жамоаси ҳисобида барча медаллардан биттадан бор. Биттадан олтин ва кумуш медални қўлга киритган Словения терма жамоаси кучли учликка якун ясаган.