Шавкат Раҳмоновнинг рафиқаси ва фарзанди ЙТҲга учради, ҳодиса оқибатида вафот этганлар борлиги айтилмоқда

Маълум бўлишича, воқеа 27 июль куни соат 08:50 да Олма-Ота-Екатеринбург Республика автомагистралининг 299-километрида юз берган. Қарағанда вилоятидан Олма-Ота шаҳри томон кетаётган Toyota Land Cruiser 200 ҳайдовчиси рул бошқарувини йўқотиб, транспорт воситасини ағдариб юборган. Йўл-транспорт ҳодисаси натижасида икки киши ҳалок бўлиб, яна икки киши шифохонага етказилган.

Tengrinews.kz манбасига кўра, автомобилни Гулайим Раҳмонова бошқарган. UFC жангчиси Шавкат Раҳмоновнинг рафиқаси бўлмиш Гулайим ўғли ва дўстлари билан Қарағандадан Олма-Отага кетаётгани айтилади.

Ҳодиса оқибатида 39 ёшли йўловчи З.А. воқеа жойида вафот этган. Яна бир йўловчи, 35 ёшли А.С. Мўйинқум туман касалхонасига олиб кетилаётганда вафот этган.

Раҳмонова ва унинг уч ёшли ўғли ҳам шу касалхонасига олиб келинган ва травматология бўлимига ётқизилган, уларнинг аҳволи ўртача оғир деб баҳоланмоқда.