Шоҳжаҳон Эргашев тарозига чиқди, бугун жанг! ФОТОГАЛЕРЕЯ

Бугунги жангда нокаутчи номини олган ҳамюртимизга аргентиналик Назарено Гастон Руиз рақиблик қилади. Аслида Эргашев угандалик Бадру Лусамбия билан жанг ўтказиши керак эди. Лекин жангга уч кун қолганида Бадрунинг Краснодарга кела олмаслиги маълум бўлди. 

Кеча боксчилар тарозидан ўтиш маросимида иштирок этишди. Ҳар иккала боксчи ҳам белгиланган вазн меъёрини бажаришди. Бугун режага кўра Шоҳжаҳон Эргашев ва Назарено Гастон Руиз ўртасидаги жанг Тошкент вақти билан соат 21:00да бошланиши керак.

Маълумот учун, Шоҳжаҳон шу кунгача профессионал рингда 15та жанг ўтказган ва уларнинг барчасида ғалаба қозонган. Баҳсларнинг 14 тасида рақибларини муддатидан олдин мағлуб этган. Руиз эса 49 маротаба рингга кўтарилган ва уларнинг 32 тасига ғалаба қозонган (11 та нокаут). 17 маротаба имкониятни бой берган (2 та нокаут).

Бугун Краснодардаги “Олимп” спорт саройида бўлиб ўтадиган жангда ҳамюртимизга ғалаба тилаймиз. Шоҳжаҳон айни пайтда ўз вазн тоифасида WBA International чемпионлик камари соҳиби бўлиб турибди.