Султонов Манишдан ўтган ҳафтадаги мағлубият учун реванш олди

Мукофот жамғармаси 15 000 долларни ташкил этувчи ушбу турнирда ҳамюртимиз Ҳумоюн Султонов ҳам ўз имкониятини синовдан ўтказяпти. Мамлакатимизнинг биринчи ракеткаси жуфтликдаги иштирокини ғалаба билан бошлаган эди. 

Бироз аввал у яккаликнинг илк даврасида кортга чиқди. Чандигарҳ турнирида биринчи рақам остида таснифланган Султонов 1/16 финалда ҳиндистонлик Маниш Сурешкумарни ортиқча қийинчиликсиз мағлубиятга учратди - 6/2, 6/3. Султонов 74 дақиқа давом этган учрашувда 5, Сурешкумар эса 4 та эйс зарбасини амалга оширди.   

Таққослаш учун, Ҳумоюн ATP рейтингида 331, Маниш эса 877-поғонадан жой олган. Қизиғи, теннисчилар ўтган ҳафта Нью-Делидаги турнирнинг биринчи босқичида ҳам ўзаро тўқнаш келишганди. Ўшанда Султонов рейтингда ўзидан 548 поғона қуйида бораётган Сурешкумарга 6/4, 5/7, 4/6 ҳисобида ютқазиб қўйганди.