Суперлига. Бугун 10-турнинг дастлабки 4та ўйини бўлади

ДИНАМО — ҚИЗИЛҚУМ

Бу мавсумда ўз уйида ютқазмаган "Динамо" (3 ғалаба ва 2 дуранг), сафарда ҳали ғалаба қозона олмаган "Қизилқум"ни (2 дуранг ва 3 мағлубият) қабул қилади.

Самарқанд клуби Суперлигадаги охирги 4та ўйинда мағлуб бўлгани йўқ (1 ғалаба ва 3 дуранг). Икки турдан буён рақиблар "Динамо" дарвозасини ишғол қила олишмаяпти.

"Қизилқум" эса сўнгги икки турда ғалаба нималигини билмади. Навоий шаҳри клуби тўрт турдан буён рақиблари дарвозасига биттадан гол уриб келмоқда.

Бу икки клуб Ўзбекистон чемпионатларида 34 марта ўзаро ўйин ўтказишган. Шундан 15тасида "Қизилқум"нинг қўли баланд келган, 10та учрашувда Самарқанд клуби зафар қучган. Қолган 9та ўйинда ғолиб аниқланмаган.

"Қизилқум" ўз тарихида 3 марта бу клубни сафарда мағлуб эта олган экан. Ўзаро ўйинларнинг охирги 4тасида хоҳ уйда, хоҳ сафарда бўлсин "Динамо" умуман ғалабага эриша олмаган (1 дуранг ва 3 мағлубият).

СУРХОН — ҚЎҚОН-1912

Бу мавсумда ҳозирча энг кам (7та) гол ўтказган "Сурхон" энг кўп (20та) гол ўтказган "Қўқон-1912" билан тўқнаш келади.

"Сурхон"нинг ўз майдонидаги мағлубиятсиз серияси 5та ўйинни ташкил этмоқда (2 ғалаба ва 3 дуранг).

"Қўқон-1912" сўнгги бешта турни фақат сафарда ўтказди ва бу ўйинларда бир марта ғалаба қозонди холос. Жамоа тўртта ўйиндан буён юта олмаяпти.

Бу икки клуб чемпионат доирасида 16 марта тўқнаш келишган. Саккиз бор Термиз клуби, етти бор Қўқон клуби ғолиб бўлган. Фақат бир марта дуранг қайд этилган.

Сўнгги марта "Қўқон-1912" Термиздан 1999 йилги мавсумда ғалаба билан қайтган экан.

НАВБАҲОР — АНДИЖОН

Бу турдаги водий дербиси. "Навбаҳор"нинг мағлубиятсиз серияси олтита ўйинга етди. "Андижон" эса аксинча тўртта ўйиндан буён ғалаба қозона олмаяпти.

Ушбу клублар Ўзбекистон чемпионатида бунга қадар 46 марта ўзаро ўйин ўтказишган. Каттагина устунлик Наманган клуби томонида. "Навбаҳор" 24 бор зафар қучган. 10 марта "Андижон" 3 очкони қўлга киритган. Қолган 12та учрашувда эса дуранг кузатилган.

"Навбаҳор" ўз тарихида Наманганда бу жамоага ҳеч қачон мағлуб бўлмаган экан (18 ғалаба ва 5 дуранг).

МЕТАЛЛУРГ — БУНЁДКОР

Ўтган турда бир хил 0:0 ҳисобида дуранг ўйнаган икки клубнинг ўзаро тўқнашуви.

"Металлург" бу мавсум ҳозиргача ўз майдонида умуман мағлуб бўлмади (3 ғалаба ва 1 дуранг). "Бунёдкор" эса чемпионатдаги сўнгги икки турда мағлуб бўлгани йўқ.

Бекобод клуби кетма-кет икки тур рақиблар билан 0:0 ҳисобларида дуранг ўйнади.

Бу икки клуб шу кунгача ўзаро 26 марта ўйин ўтказишган. Шундан 19тасида "қалдирғочлар" зафар қучишган. Уч марта "Металлург" ғолиб бўлган ва 4 марта дуранг қайд этилган.

Охирги марта "Бунёдкор" Бекободдан 2015 йилги мавсумда ғалаба билан қайтган экан. Шундан кейин сафардаги 4та ўйинда "қалдирғочлар" бу рақибни юта олишмади.