Суперлига. Бугун Олмалиқда Қосимов - Абрамов тўқнашуви

Миржалол Қосимов ўзининг собиқ клубига қарши шогирдларини бошлаб тушади. Бир неча йил давомида "Бунёдкор"да ишлаган Қосимов илк бор ушбу жамоага қарши томонда бўлади.

Олмалиқ клуби бу мавсум ўз майдонида умуман ютқазмади ва ҳозирча энг кўп гол урган (9) жамоа бўлиб турибди. "Бунёдкор" эса хали умуман дуранг ўйнагани йўқ.

АГМК ўз майдонидаги 11та ўзаро ўйиннинг 2тасида ғолиб чиққан. "Бунёдкор" Ўзбекистон чемпионатида бу жамоага қарши ўтган охирги 11та учрашувдан буён ютқазмай келмоқда.

2018 йил "Бунёдкор"да ўйнаган Суҳробжон Султонов, Дилшод Жўраев, Мурод Тошматов, Мирғиёс Сулаймонов, Миржамол Қосимов, Шаҳзодбек Нурматов ва Расул Йўлдошев бу мавсум АГМК шарафини ҳимоя қилишмоқда. Ўтган мавсум АГМКда тўп тепган Лутфулла Тўраев эса ҳозир "Бунёдкор"да ўйнамоқда.