Tennis Australia Жоковичнинг депортацияси бўйича баёнот берди

«Аввало, Австралия иммиграция вазири ва Федерал суди томонидан қабул қилинган қарорни ҳурмат қилишимизни таъкидламоқчиман.

Australian Open аллақачон бошланди ва бизнинг мақсадимиз дунёдаги энг катта спорт тадбирларидан бирига мезбонлик қилиш ва иштирокчилар ҳамда томошабинлар учун энг яхши турнирни тақдим этишдир. 

Ўтган йили Tennis Australia расмийлар билан теннисчилар, ходимлар ва мухлислар ҳавфсизлигини таъминлаш учун яқиндан ҳамкорлик қилган. Пандемия даврида бундай кенг кўламли тадбирни ташкил этиш барча манфаатдор томонлардан катта саъй-ҳаракатларни талаб қилади.

Афсуски, сўнгги воқеалар барчани чалғитди ва спортчиларга таъсир қилди. Австралия ўзининг теннис анъанаси билан фахрланади. Ҳозирча барча эътиборни севимли ўйинимизга қаратишни таклиф қиламиз. Бизни икки ҳафталик ажойиб теннис кутмоқда», - дейилади федерация баёнотида.