Токиодаги Олимпия ўйинларига тайёргарлик йўлида: Умид Аҳмаджонов Японияга жўнаб кетди

Ўзбекистон Миллий олимпия қўмитаси Президенти, мамлакат футбол ассоциацияси биринчи вице-президенти Умид Аҳмаджонов ташкилий қўмита раҳбарлари билан учрашиб, музокаралар олиб бориш учун кунчиқар юртга жўнаб кетди. МОҚ раҳбари у ерда кўпгина масалалар бўйича музокаралар ўтказиши режалаштирилган.

Жумладан, “Takasaki Foundation” вице-президенти Митсуо Юки, Токиода Олимпия ва Паралимпия ўйинлари ўтказиш бўйича вазир Тошиаки Эндо, Япония Миллий олимпия қўмитаси президенти Цунэкадзу Такэдалар билан учрашувлар ташкил қилинади. Томонлар яқинлашиб келаётган Олимпия ўйинларига олиб борилаётган тайёргарлик юзасидан ўзаро фикр алмашадилар.

Қайд этиш лозимки, Япония шу пайтга қадар уч маротаба Олимпия ўйинларига мезбонлик қилган. 1964 йилда Токиода ёзги Олимпиада ўтказилган бўлса, 1972 йил Саппоро, 1998 йилда эса Нагано қишки Олимпия ўйинларига мезбонлик қилган.

Маълумот учун, Умид Аҳмаджонов Япониядан тўғри Россия пойтахти Москва шаҳрига йўл олади. У ерда FIFA Конгрессида иштирок этиб, футбол бўйича жаҳон чемпионатининг очилиш учрашуви – Россия-Саудия Арабистони терма жамоалари ўртасидаги баҳсни “Лужники” стадионининг мартабали меҳмонлар ложасидан томоша қилади.