Тўрабоев фахрийлар ўртасида жаҳон чемпионатида шоҳсупага кўтарилган илк ўзбекистонлик!

Таъкидаш жоиз, Ўзбекистон терма жамоаси илк бор фахрийлар ўртасидаги жаҳон чемпионатида иштирок этди. Ўзбекистон дзюдоси тарихида шу кунгача ҳеч ким фахрийлар ўртасидаги жаҳон чемпионатида татамига чиқмаганди. Илк иштирок терма жамоамизга кумуш медаль келтирди. Мусобақанинг сўнгги куни -90 кг вазн тоифасидаги беллашувларда юртимиз шарафини ҳимоя қилган Бекзод Тўрабоев финалгача мағлубиятсиз етиб бориб, жаҳон вице-чемпионига айланди. 

Ўзбекистон дзюдо федерацияси раиси ўринбосари ҳисобланган Бекзод Тўрабоев финалга қадар испаниялик Карлос Альварес, бразилиялик Жонатас Барбоза, украиналик Дмитро Калченкони мағлубиятга учратган эди. Мезбонлар вакили Бруно Сильвага қарши кечган финал баҳсида Тўрабоевга белидан олган жароҳати панд берди. 

Жаҳон чемпионатининг биринчи куни ҳамюртларимиздан Жамшид Файзиев (-100 кг) бронза медали учун кечган беллашувда рақибига имкониятни бой бериб, кучли бешликдан жой олганди. Кеча эса -81 кг вазндаги дзюдочимиз Жаҳонгир Эшманов бронза йўлидаги ўтиш баҳсида мағлуб бўлиб, еттинчи ўринни эгаллади. 

Жаҳон чемпионатида иштирок этган терма жамоамиз:

-81 кг: Фарруҳ Бобоев

-81 кг: Жаҳонгир Эшманов

-90 кг: Бекзод Тўрабоев

-100 кг: Жамшид Файзиев 

-100 кг: Мухторхўжа Тулаев 

 Маълумот учун, бугун кечқурун соат 01:30да Ўзбекистон фахрий дзюдочилар делегацияси Лиссабондан Тошкентга қайтиб келади.