Тошкентда ўтадиган проф бокс оқшомининг яна бир қизиқарли жанги тасдиқланди + ПОСТЕР

Мазкур нуфузли тадбир WBC Eurasia ҳамда Ўзбекистон профессионал бокс федерацияси ҳамкорлигида ўтказилади. Бокс кечасида Олимпия чемпионлари ва жаҳон боксининг машҳур юлдузлари иштирокида бир қатор жанглар бўлиб ўтади. Ташкилотчилар томонидан яна бир қизиқарли жанг эълон қилинди. 

Асосий карддан ўрин олган ва камида co-main event мақоми берилиши кутилаётган ушбу жанг енгил вазн тоифасида кубалик икки карра Олимпия чемпиони Робейси Рамирес ҳамда тожикистонлик иқтидорли боксчи Асрор Воҳидов ўртасида кечади.

Маълумот учун, Рамирес 2012 йил Лондон ва 2016 йил Рио-де-Жанейро Олимпия ўйинлари ғолиби ҳисобланади. Шунингдек, у Панамерика ўйинлари, Марказий Америка ва Кариб ҳавзаси ўйинлари ғолиби, Ёшлар Олимпиадаси чемпиони ҳамда AIBA ёшлар ўртасидаги жаҳон чемпионати ғолиби сифатида ҳам катта ютуқларга эришган.

Профессионал рингда кубалик боксчи 17 та жанг ўтказиб, 14 ғалаба ва 3 мағлубият қайд этган. Ғалабаларининг 9 тасини нокаут эвазига якунлагани унинг юқори даражадаги ҳужумкор услубидан далолат беради.

Унинг рақиби Асрор Воҳидов ҳаваскор боксда ёшлар ўртасида жаҳон чемпионлигини қўлга киритган. 30 ёшли боксчи профессионал фаолияти давомида 14 та жангда иштирок этиб, 13 ғалаба ва 1 мағлубият қайд этган. Унинг 7 та ғалабаси муддатидан аввал нокаут орқали қўлга киритилган. Рамирес - Воҳидов жанги 10 раунддан иборат бўлади.