23 дек 08:04
Янгиликлар

Бокс/ММА

UFC президенти Конор, Чимаев ва Холлоуэй иштирокидаги турнирларни тасдиқлади + ФОТО

UFC президенти Дэна Уайт ўзининг "Инстаграм" саҳифасида промоушеннинг бир йўла учта турнирини анонс қилди.

Бу турнирлар 2021 йилнинг 16, 20 ва 23 январь кунлари ўтказилади. 16 январь кунги оқшомнинг марказий жанги ярим енгил вазн тоифасида собиқ жаҳон чемпиони Макс Холлоуэй ҳамда Келвин Каттар ўртасида бўлиб ўтади.

20 январь кунги турнирнинг асосий жанги жорий мавсум кашфиёти Хамзат Чимаев иштирокида кечади. Ярим ўрта вазнда Швеция шарафини ҳимоя қилаётган Хамзат Леон Эдвардсга қарши октагонга кўтарилади.

Ниҳоят, 23 январь куни UFC 2021 йилнинг илк рақамланган турнирини ўтказади. UFC 257 турнирининг марказий жангида икки вазн тоифасида собиқ UFC чемпиони Конор Макгрегор ҳамда собиқ вақтинчалик чемпион Дастин Порье ўзаро октагонда тўқнаш келади. Бу жанг Порье учун реванш мақомида бўлади.

Маълумот учун, ушбу барча турнирлар Абу-Дабидаги "Жанглар ороли"да бўлиб ўтади.