Уимблдон. Барча ярим финалчилар маълум (аёллар)

Аёллар ўртасидаги баҳсларда чорак финал учрашувлари якунига етиб, барча ярим финалчилар номи маълум бўлди.

Жаҳоннинг биринчи ракеткаси австралиялик Эшли Барти Wimbledon чорак финалида WТА рейтингида 75-ўринни эгаллаб турган ҳамюрти Айла Томлжановични мағлуб этди. 1 соат 6 дақиқа давом этган учрашувда Барти 6/1, 6/3 ҳисобида ғалаба қозониб, мусобақанинг ярим финалига йўл олди. 

Ўз навбатида жаҳоннинг 28-ракеткаси германиялик Анжелик Кербер чорак финалда WТА рейтингида 22-ўринни эгаллаб турган чехиялик Каролина Муховани 1 соату 15 дақиқа давом этган учрашувда 6/2, 6/3 ҳисобида мағлуб этди.

Уимблдоннинг ярим финалида Барти германиялик Анжелик Кербер билан тўқнаш келади.

Жаҳоннинг тўртинчи ракеткаси, беларуслик Арина Соболенко чорак финалда WТА рейтингида 24-ўринни эгаллаб турган Тунис вакили Онс Жаберни мағлуб этди. 1 соат 14 дақиқа давом этган учрашувда Соболенко рақибасини 6/4, 6/3 ҳисобида мағлубиятга учратди.

Чехиялик теннисчи Каролина Плискова эса чорак финалда швейцариялик Виктория Голубични мағлуб этди. 1 соат 22 дақиқа давом этган учрашувда жаҳоннинг 13-ракеткаси Каролина WТА рейтингида 66-ўринни эгаллаб турган 28 ёшли Голубични 6/2, 6/2 ҳисобида мағлуб этди.

Энди Соболенко ва Каролина Плишкова финал йўлланмаси учун ўзаро кураш олиб борадилар.