Венесуэла Жаҳон чемпионати плей-офф босқичида иштирок этиши мумкин

ЖЧ-2026 йўлидаги Жанубий Америка саралаш босқичининг сўнгги тури асаббузарликларга бой ўтди. Ўтказилган 18 турдан сўнг жаҳон чемпионати йўлланмаси учун плей-офф чиптаси якунда Боливияга насиб этди. Бироқ вазият кутилмаган ўзгаришларга юз тутиши мумкин.

Барчаси шуни кўрсатмоқдаки, Венесуэла плей-офф йўлланмаси учун курашишда сўнгги имкониятга эга бўлиши мумкин. Сўнгги соатларда допинг ҳолатлари сабабли ФИФА томонидан қўлланилиши мумкин бўлган санкциялар ҳақида хавотирли хабарлар тарқалди. Бир неча ой олдин ошкор бўлган бу воқеа эндиликда ҳуқуқий жиҳатдан кучайиб бормоқда.

Сўнгги соатлар ичида саралаш ўйинларида допинг-тестлари ижобий натижа берган Боливиянинг уч нафар футболчисига нисбатан очилган ишларни ҳал қилиш бўйича ФИФА ва КОНМЕБОЛга босим кучайди. Бу ҳолат жамоавий допинг ишлатилишини кўриб чиқишга асос бўла оладиган минимал миқдордаги ўйинчиларни ўз ичига олади.

Даставвал бу ишга алоқадорлар биринчи инстанцияда ижобий натижа қайд этган Рамиро Вака ва Борис Сеспедес эди. Бироқ Боливия футбол федерациясига яқин манбаларнинг таъкидлашича, саралаш доирасидаги Чили ва Уругвайга қарши баҳсларда яна бошқа допинг ҳолатлари аниқланган бўлиши мумкин.

Қайта текширув натижаларини кутаётган бошқа ўйинчиларнинг исм-шарифлари очиқланмаган бўлса-да, аниқ бўлаётган жиҳат шуки, гап Эль-Альто шаҳрида ўтказилган ўйинларда нафас олишни яхшилаш учун ишлатилган тиббий препарат ҳақида бормоқда. Бу ҳолат турнир жадвалида 7 очко олиб ташланишидек жазога олиб келиши мумкин.

Ушбу вазият юзасидан КОНМЕБОЛ ҳозирча ҳеч қандай муносабат билдиргани йўқ ва ФИФАнинг якуний қарори кутилмоқда. Шунингдек, бу ҳолат Венесуэла футбол федерацияси томонидан ушбу ишларни тезроқ ҳал қилишни талаб қилиб бошланган ҳуқуқий босим фонида юз бермоқда.

Венесуэла бу имконият паст эканлигини билади, бироқ регламент бузилгани ўз исботини топса, плей-офф йўлланмасини қўлга киритиш учун барча қонуний чораларни кўришини маълум қилди. Бу борада КОНМЕБОЛ ФИФАдан ушбу жараённинг якуний қарори бўйича хабарнома кутмоқда.

Эслатиб ўтамиз, қитъалараро плей-офф босқичида Боливия Ироқ терма жамоасига қарши майдонга тушиши керак. Венесуэла эса Ўзбекистон мезбонлик қилган FIFA Series турнирида иккинчи ўринни эгаллади.