Венесуэла бош мураббийи: "Турнирда жисмоний жиҳатдан кучли, кўп югурадиган ва босим ўтказадиган жамоаларга қарши ўйнаяпмиз"

"Тринидад ва Тобаго устидан қозонилган ғалабадан жуда хурсандман, ФИФАга турнир таклифи учун миннатдорлик билдираман. Мазкур мусобақа биз учун ўсишда давом этиш, янги вариантларни излаш ва ўйинчиларни кўздан кечиришда жуда асқотади. Биз одатда тўқнаш келмайдиган терма жамоалар билан иккита ўйин ўтказиш имконига эга бўлдик, бироқ бугунги кунда футбол анча тенглашган – рақиблар жисмоний жиҳатдан кучли, кўп югурадиган ва босим ўтказадиган жамоалардир.

Бу эса бизга ўз ғоямизни ва ўзлигимизни сақлаб қолишда, шунингдек, терма жамоада камроқ майдонга тушаётган йигитларни синаб кўришда ёрдам беради; бугун улар буни уддалашди. Шундай экан, хулоса ижобий.

Кўплаб яхши жиҳатлар билан қайтяпмиз, албатта, хатолар устида ишлашимиз ҳам керак, лекин жамоанинг жипслиги ва йигитларнинг терма жамоага бўлган садоқати бизни хотиржам қилади, бу эса келгусидаги режаларимиз олдидан бизга куч бағишлайди", деди 41 ёшли мутахассис.

Эслатиб ўтамиз, Венесуэла 30 март куни Ўзбекистонга қарши баҳс олиб боради.