WTA бир нечта номинация бўйича йилнинг энг яхшиларини ошкор қилди

Сайёрамизнинг биринчи рақамли теннис маликаси, австралиялик Эшли Барти ушбу сўровномада энг кўп овоз тўплаб, 2021 йилнинг "Энг яхши аёл теннисчиси" деб топилди. 

"Йил ўсиши" номинациясида чехиялик Барбора Крейчикова эътироф этилди. У жорий мавсум учта турнир, шу жумладан "Ролан Гаррос"да бош мукофот соҳибасига айланди. 

"Йил кашфиёти" номинациясида эса кутилганидек, британиялик Эмма Радукану ғолиб бўлди. Эмма АҚШ Очиқ чемпионатида зафар қучганди. 

"Йил қайтиши" номинациясида испаниялик Карла Суарес Наварро тан олинди. Оғир касалликка учраган Карла бу йилги мавсумда фаолиятини қайта тиклаган, турнирларда иштирок этган ва кейин яна катта теннис билан хайрлашганди.  

2021 йилнинг энг яхши жуфтлиги сифатида чехиялик теннисчилар Катержина Синякова ва Барбора Крейчикова топилди. Улар дунёнинг биринчи рақамли жуфтлиги ҳисобланади.