ХОҚ раҳбари: AIBA билан ҳозирги ҳолатда боксчилар жабр чекади

Икки кунга мўлжалланган йиғилишда ҳаваскор бокснинг Олимпия ўйинлари дастуридан чиқариш, Халқаро ҳаваскор бокс ассоциацияси (AIBA)нинг бугунги фаолиятига боғлиқ муҳим масалалар муҳокама қилинади. 

Халқаро олимпия қўмитаси (ХОҚ) илк бор AIBAга Бразилияда ўтган Рио-2016 Олимпиадасидаги нохолис ҳакамликдан сўнг жиддий эътироз билдирганди. Ўшанда ХОҚ AIBA олдига холис ҳакамликни йўлга қўйиш, ташкилотнинг молиявий ҳолатини яхшилаш, допингга қарши курашиш каби талабларни қўйган эди. 

Яқинда эса ХОҚ президенти Томас Бах AIBAга Ғофур Раҳимовнинг президенти этиб тайинланганидан ҳавотирга тушаётганини яширмаганди. Икки кунлик йиғилишда AIBAнинг янги ҳисоботи кўриб чиқилади ва шундан сўнг бокснинг Олимпиада дастурида бўлиш ёки чиқарилиш масаласига ойдинлик киритилади. 

- Биз спортчиларни айрим раҳбарларнинг қинғир ишлари учун жазоламоқчи эмасмиз. Имкон қадар боксчиларнинг Олимпия ўйинларидан четда қолмасликлари учун ҳаракат қиламиз, - деди Халқаро олимпия қўмитаси президенти Томас Бах. 

Эслатиб ўтамиз, шу йилнинг 2-3 ноябрь кунлари Москва шаҳрида ўтказилган Халқаро ҳаваскор боксчилар ассоциациясининг ҳисобот-сайлов йиғилишида ўзбекистонлик Ғофур Раҳимов AIBAнинг янги президенти этиб сайланганди.