Хорижлик ҳакам ва мураббийлар кураш қоидаларини Ўзбекистонда ўрганишади

Халқаро кураш институти ҳамда Ўзбекистон кураш федерацияси томонидан илк бора ташкил этилган мазкур анжуманда миллий курашимизни ривожлантириш бўйича таклифлар ҳам илгари сурилмоқда.

Кураш спортининг 2018 йилдан эътиборан Осиё ўйинлари дастурига расман киритилиши унга бўлган қизиқишни сезиларли даражада ошириб юборди. Натижада дунёнинг жуда кўплаб давлатларидаги мураббий ва ҳакамларда кураш қоидалари билан яқиндан танишишга эҳтиёж туғилди. Ана шу мақсадда Халқаро кураш институти ҳамда Ўзбекистон кураш федерацияси томонидан ташкил этилган анжуман хорижлик мутахассисларнинг кураш қоидаларини ҳам назарий, ҳам амалий жиҳатдан ўрганишларида қўл келади.

Халқаро семинарда ўзбекистонлик мураббий ва ҳакамлар билан бир қаторда Марказий Осиё давлатларидан Эрон, Тожикистон, Қирғизистон, Туркманистон, Афғонистон, қолаверса, Озарбайжон, Хитой Тайпейи, Ироқ каби ўнлаб мамлакатлардан 50 нафарга яқин мутахассис иштирок этмоқда.

Тадбирда Кураш Халқаро ассоциацияси асосчи раиси Комилжон Юсупов ушбу спорт турининг бугунгача босиб ўтган йўли ҳақида қисқача маълумот берди. Халқаро семинарда иштирок этаётган Кураш Халқаро ассоциациясининг техник директори, эронлик Ризо Носирий Осиё ўйинларидан кейин кураш спорт тури бўйича ҳакамлар ва мураббийларга бўлган талаб ортганлигини алоҳида эътироф этди.

Шунингдек, семинарда яна бир масала – Халқаро Кураш институтини Халқаро Кураш Университетига ўзгартириш ва ушбу спорт туридаги таълим тизимини янги босқичга олиб чиқиш масаласи ҳам муҳокамага қўйилди ва бир овоздан маъқулланди. Ўн кун давом этадиган халқаро семинарда иштирокчилар олган билимларини амалиётда синаб кўриш имкониятига ҳам эга бўлишади.

- Кураш бугунги кунда дунё спорти оиласи сафига дадил кириб бормоқда. Айниқса, XVIII ёзги Осиё ўйинларидан кейин унга бўлган қизиқиш янада ортди, деди биз билан суҳбатда Кураш Халқаро ассоциацияси техник директори, эронлик Ризо Носирий. – Биз бугун кураш ватанида бўлиб қоидалар билан яқиндан танишиб олишни мақсад қилганмиз. Осиё ўйинларидан кейин қитъамиздаги баъзи давлатларда кураш қоидалари китоб шаклида чоп этилган ва уларда айрим хатоликлар учрамоқда. Шуни айтиш керак, бугун дунё тан олган спорт тури кураш қоидалари Комилжон Юсупов томонидан ишлаб чиқилган ва унга ўзгартиришларни ҳам айнан кураш Ватани вакиллари амалга ошириши мумкин. Назаримда, бугунги кураш қоидалари мукаммал ишлаб чиқилган ва уни янада яхши ўрганиб, кенг тарғиб этишимиз керак.

- 2018 йил кураш спорти тарихида ўчмас из қолдирди, десам муболаға бўлмайди. Давлатимиз раҳбарининг курашни ривожлантиришга оид қарорида белгилаб берилганидек, 6 сентябрь – “Кураш куни” сифатида илк бор расман нишонланди. Юртимизда Ўзбекистон Президенти соврини учун ўтказилган халқаро турнирлар ҳам савияси жиҳатидан юксак даражада ташкил этилди ва бу жараёнда ҳамкор ташкилотларимизнинг ҳам хизматини алоҳида таъкидлаб ўтиш жоиз. Осиё ўйинлари дастурига курашнинг киритилгани эса алоҳида тарих. Энди дунёда кураш спорт турига бўлган эҳтиёж ортди. Улар қоидаларни, умуман, кураш спорти тарихини қаердан ўрганади? Албатта биздан. Шу мақсадда Халқаро кураш институтининг фаолиятини қайта кўриб чиқиш ва уни Халқаро кураш университетига айлантиришга қарор қилдик. Ўйлайманки, бундай семинарлар бундан буён янада кўп ўтказилади ва кураш оиласи сафи янада кенгаяди, - деди Кураш Халқаро ассоциацияси асосчи раиси Комилжон Юсупов.

Отабек Эшмаматов, Муҳаммад АМИН (сурат), ЎзА