Ёш шахматчиларимиз Осиё чемпионатида 5 та олтин медални қўлга киритишди

Мазкур нуфузли мусобақада тегишли ёш тоифалари бўйича Ўзбекистон чемпионатларида юқори натижа кўрсатган шахматчиларимиз Умида Омонова, Руқия Олимова, Афруза Ҳамдамова, Ҳумоюн Бегмуратов ва Абдималик Абдисалимов юртимиз шарафини ҳимоя қилишди.

Ёшларимиз қитъа биринчилигида 5 та олтин, 2 та кумуш ва 1 бронза медални қўлга киритишди.

Бугун, 9 апрель куни стандарт йўналиши бўйича сўнгги 9-тур баҳслари ўтказилди.

10 ёшгача бўлган спортчилар ўртасида ҳамюртимиз Ҳумоюн Бекмуратов 8 очко жамғарган ҳолда олтин медалга сазовор бўлди. Ушбу ёш тоифасида иккинчи ўрин ҳиндистонлик Маянк Чакрабортига, учинчи ўрин эса эронлик Моваҳед Синага насиб этди. Ҳумоюн ушбу мусобақанинг блиц баҳсларида ҳам олтин медални қўлга киритди.

10 ёшгача қизлар ўртасида ҳамюртимиз Афруза Ҳамдамова кумуш медални қўлга киритди. 9-турда Ҳамдамова эронлик кучли рақибини қора доналарда енгишнинг уддасидан чиқди. Шу тариқа, 9 имкониятдан 7 очко жамғарган ҳамюртимиз кумуш медалга эга чиқиб, Осиё вице чемпиони номига сазовор бўлди. Афруза мусобақанинг рапид баҳсларида ҳам кумуш медални қўлга киритган эди.

Куни кеча Ўзбекистон тарихида FIDE устаси унвонини қўлга киритган энг ёш аёл шахматчига айланган Умида Омонова 14 ёшгача қизлар ўртасидаги баҳсларда иштирок этиб, Ўзбекистон ҳисобига навбатдаги олтин медални тақдим этди. 9 ўйинда 7 очко жамғарган Омонова кучли рақибларини ортда қолдириб, Осиё чемпионлигига сазовор бўлди.

Яна бир ҳамюртимиз Абдималик Абдисалимов ҳам 18 ёшгача йигитлар ўртасида олтин медални қўлга киритди. Мусобақа давомида барқарор ўйин намойиш этган Абдисалимов сўнгги турда оқ доналарда ўйнаб, Ҳиндистон вакилини мағлуб этди ва 7 очко жамғарди. Энг яқин таъқибчиси мезбон шахматчини ярим очкога ортда қолдирган ҳамюртимиз якунда Осиё чемпионлигини расмийлаштирди. Абдималик мусобақанинг рапид турнирида ҳам олтин медалга сазовор бўлган эди.

Жисмоний тарбия ва спорт вазирлиги Матбуот хизмати