Mirzahakim To'xtamirzaev: "Olimpiadada qarzlarni to'layapmiz? Kimdan qarz olgandik?"

Jurnalist sharhlovchiga "Tokio Olimpiadasida Rio va Osiyo chempionatlaridagi qarzimizni to'layapmizmi?" mazmunida savol berdi: 

Mirzahakim To'xtamirzaev esa ushbu savolga quyidagicha javob berdi:

- Qanaqa qarz? Kimdan qarz olgandik? Bilasizmi, el og'ziga elak tutib bo'lmaydi. Agar shunday bo'lsa 2017 yilda Toshkentda o'tkazilgan Osiyo chempionatidan so'ng qo'shnilarimiz Qozog'iston terma jamoasi vakillari hafa bo'lishlari lozim edi. Ammo o'shanda ular ortiqcha etiroz bildirishmagandi.

Mayli, o'sha yili Osiyo chempionatida o'z uyimizda boshqalardan kuchli ekanligimizni isbotladik. Lekin, Ekaterinburgdagi jahon chempionatida ham birinchi bo'ldik. Agar bunday tabir bilan aytadigan bo'lsak, o'sha musobaqada rossiyaliklar birinchi bo'lishlari kerak edi. SHuning uchun, qarzlarni to'layapmiz degan fikrga qo'shilmayman.

Sportda shunday narsa bor: yaqqol ustunlikka ega jamoaga barcha qarshi bo'ladi.

O'z vaqtida Kuba jahon boksida ustun bo'lganda Rossiya, AQSH, O'zbekiston, Qozog'iston, Germaniya va boshqa mamlakat bokschilari uchun sharaf edi. Bugun barcha o'zbek bokschisini mag'lub etishiga intilmoqda. Ular bu orqali o'z obro'larini oshirib olishga urinmoqda. Bu tomonlama raqiblarda shijoat kuchli bo'lishini tan olishimiz lozim. 

Hakamlar ham inson, ular ham qachondir, kimgadir xayrixohlik bildiradi. Yodingizda bo'lsa, Hasanboy Do'smatov Germaniyadagi jahon chempionati finaliga chiqqan va o'shanda yakunda kubalik bokschiga qarshi jangdan so'ng kumush medalni qo'lga kiritgandi. O'shanda jangdan so'ng kubalik bokschining qo'li baland ko'tarilganida, raqib sekundantlarining og'zi ochilib qolgandi. O'shanda buni ko'rganman. Ana shunday hakamlarga insof bersin, bu sport.

To'liq intervyuni tomosha qiling: