19 yoshli Koko Gauff US Open finalida!

Turnirning ayollar o'rtasidagi bahslarida ilk finalchining nomi malum bo'ldi. Jahonning oltinchi raketkasi Koko Gauff yarim finalda WTA reytingida 10-o'rinni egallab turgan chexiyalik Karolina Muxovadan 6:4, 7:5 hisobida ustun keldi.

SHu tariqa, 19 yoshli amerikalik tennischi faoliyatida ikkinchi bor "Katta Dubulg'a" turkumiga kiruvchi turnir finaliga chiqdi. O'tgan yili u "Rolan Garros"dagi hal qiluvchi bahsda mag'lub bo'lgandi.

Umuman olganda, WTA darajasidagi turnirlarda Gauff ettinchi bor finalga chiqdi va oltinchi chempionlik uchun kurashadi.

"Uimbldon-2023"dan keyin amerikalik sportchi 18 uchrashuvning 17 tasida g'alaba qozondi. Ayni vaqtda u ketma-ket 11 o'yindan iborat g'alabali seriyaga ega. AQSH Ochiq chempionatidan oldin u Cincinnatida chempionlikni qo'lga kiritgandi.

Gauff uyida o'tayotgan turnirning bosh sovrinini qo'lga kiritish uchun Aryna Sobolenko yoki Medison Kizga qarshi kortga chiqadi.