23 jan 11:14
Yangiliklar

Abdumalik Xalokov 28 yanvar kungi jangiga munosabat bildirdi

Teglar : Abdumalik Xalakov Lazizbek Mullajonov

Biroz avval 28 yanvar kuni Toshkentda professional boks turniri o'tkazilishi haqida xabar bergan edik.

"Yunusobod" sport majmuasida Lift promouterlik kompaniyasi tomonidan tashkil etilayotgan ushbu professional boks oqshomida Parij-2024 Olimpiadasi chempioni Abdumalik Xalokovning ham jang o'tkazishi kerak edi. Hatto tashkilotchilar tomonidan turnirning rasmiy posterida uning surati ham berilgandi.

Ammo bokschimizning o'zi saytimizga qo'ng'iroq qilib, bu turnirda jang o'tkazish bo'yicha tashkilotchilarga rad javobini berganini aytdi. Demak, Abdumalik Xalokov Toshkentdagi turnirda ringga chiqmaydi. Uning prof boksdagi ikkinchi jangini hozircha ko'rmaymiz.

Eslatib o'tamiz, Xalokov professional boksdagi debyut jangini 2023 yilning 17 noyabr kuni Toshkentda aynan LIFT promouterlik kompaniyasi tomonidan tashkil etilgan katta prof boks oqshomida o'tkazgandi. O'shanda u ukrainalik Oleksandr Egorovni ikkinchi raundda nokaut evaziga mag'lub etgan edi.