Abdurahmonov va Rahmonov Rio Olimpiadasiga boradi

Mazkur nufuzli musobaqa sport kurashlari bo'yicha Rio-2016 o'yinlariga yo'llanmalar o'ynaladigan so'nggi saralash turniri hisoblanadi.

Hozirgina ikki hamyurtimiz erkin kurash bahslarida finalga yo'llanma olish barobarida Olimpiya o'yinlari chiptasini ham qo'lga kiritishdi. Og'irlik vazni 74 kg.gacha bo'lgan polvonlar musobaqasida ishtirok etayotgan Bekzod Abdurahmonov yarim finalda qirg'izistonlik Sayakbay Usupovni 12:2 hisobida mag'lubiyatga uchratdi.

-57 kg vaznda ilk bor kattalar o'rtasidagi nufuzli musobaqada qatnashayotgan Abbos Rahmonov ham shov-shuvli tarzda finalga yo'llanma oldi. Respublika olimpiya zaxiralari kolleji o'quvchisi bo'lgan Abbos yarim finalda qirg'izistonlik Samat Nodirbek uuluni 2:1 hisobida dog'da qoldirdi. Birozdan so'ng oltin medal uchun gilamga chiqadigan bu ikki erkin kurashchimiz Rio Olimpiadasiga borish huquqini qo'lga kiritishdi.