Abdurauf Bozorboev: "Kamchiliklar ustida ishlaymiz"

Klassiklarimiz musobaqaning birinchi kuniyoq 3 ta oltin va 1 ta bronza medalini qo'lga kiritishdi. Erkin kurashchilarimizdan esa G'ulomjon Abdullaev kumush, Bekzod Abdurahmonov va Umidjon Jalolov bronza medaliga sazovor bo'lishdi. Biz Istanbuldagi reyting turniri yakunlari va oldinda turgan musobaqalarga tayyorgarlik yuzasidan erkin kurash terma jamoamiz katta murabbiyi Abdurauf Bozorboevdan intervyu oldik. 

- Abdurauf aka, dastlab musobaqa taassurotlari bilan o'rtoqlashsangiz.

- Kuchli musobaqa bo'ldi deb bemalol ayta olaman. O'z nomi bilan yilning dastlabki reyting turniri, tabiiyki, dunyoning eng kuchli kurashchilari qimmatli reyting ochkolarini to'plab olish uchun Turkiyaga kelishdi. Har bir vazn toifasida 4-5 nafardan reytingi yuqori kurashchilar gilamga chiqdi. Ular orasida Olimpiada va jahon chempionlari ko'pchilikni tashkil etdi. Bu esa medallar uchun kurash nechog'lik keskin kechganini tasdiqlaydi. 

- Erkin kurashchilarimizning ishtiroki qoniqarli bo'ldimi?

- Biz Turkiyadagi turnirga aralash tarkib bilan bordik. Yosh kurashchilarimizda hayajon, xalqaro tajribaning etishmasligi sezilib turdi. Qolaversa, yilning dastlabki musobaqasi bo'lgani uchun kamchiliklar ko'zga tashlanib qoldi. Umidjon Jalolov, Bekzod Abdurahmonov va G'ulomjon Abdullaev o'z vaznlaridan bitta yuqori vaznda o'zlarini sinab ko'rishdi. Bekzod Tokio Olimpiadasidagi vaznidan 12 kg yuqori vaznda kurashdi. SHunga qaramay, uchchala kurashchimiz ham o'zari uchun yangi vaznda Istanbul reyting turniri medalini qo'lga kiritishdi. Umidjonni vaznida dunyoning eng kuchli kurashchilari bor edi. U nomdor raqiblarini mag'lubiyatga uchrata oldi. Endi kamchiliklar yo'q emas. Texnik-taktik masalalarda ishlashimiz kerakligi oydinlashdi. Xatolarimizni bilamiz va mashg'ulotlarda shu kamchiliklarni bartaraf etish ustida ishlaymiz. Yana bir gap, yuqorida aytganimdek, bu mavsumning birinchi starti bo'ldi. SHuning uchun, hamma har xil sport formasida kelgan. 

- Endigi rejalar qanday?

- Turkiyadagi musobaqadan so'ng yigitlarga 4-5 kun dam berdik. Hozir mashg'ulotlar reja asosida davom etmoqda. Aprel oyida bizni Osiyo chempionati kutib turibdi. Asosiy etibor shu musobaqaga qaratilgan.