Adham Ochilovni tabriklaymiz!

Adham Ochilov - 1976 yilning 7 aprel kuni Toshkent shahrida dunyoga kelgan. Bolaligidan erkin kurashga oshno tutingan bugungi qahramonimiz faoliyati davomida katta yutuqlarga erishdi. 1995 yili Toshkent shahrida o'tkazilgan Markaziy Osiyo o'yinlarining kumush medali sohibi bo'ldi. Bu uning xalqaro maydondagi birinchi katta yutug'i edi. 

1996 yilda Xitoyning Syaoshan shahrida bo'lib o'tgan Osiyo chempionatida barcha raqiblarini mag'lubiyatga uchratib, oltin medalni qo'lga kiritdi. 1999 yili Turkiya poytaxti Anqara shahrida o'tgan jahon chempionatida kumush medalga ega chiqdi. O'sha yili Toshkent mezbonligida o'tgan Osiyo chempionatida bronza medali bilan taqdirlandi. 2000 yili Guylinda yana bir bor shohsupaning uchinchi pog'onasiga ko'tarildi. 2004 yil Tehronda o'tgan qita chempionatida ikki karra Osiyo chempioni degan nomga sazovor bo'ldi.

Adham Ochilovning sportdagi erishgan muvaffaqiyatlari davlatimiz tomonidan munosib taqdirlangan. 1996 yilda "SHuhrat" medali, 2000 yilda esa O'zbekiston Respublikasida xizmat ko'rsatgan sportchi unvonlari bilan mukofotlangan.

Fursatdan foydalanib, Adham Ochilovni bugungi unutilmas kun bilan muborakbod etamiz. Adham aka, farzandlaringiz, oila azolaringiz baxtiga hamisha sog'-salomat bo'ling.