Aleksandr Usik Tayson Fyuriga qarshi revansh jangidan 114 million dollar oladimi?

Aleksandr bitta jangda butun faoliyatidagidek daromad oladi. Fyuri ham zarar ko'rmaydi.

21 dekabr kuni Saudiya Arabistonida katta professional boks oqshomi bo'lib o'tadi. Turnirning asosiy bahsida bugungi kun og'ir vazn toifasining ikki eng yaxshi sportchilari - Aleksandr Usik va Tayson Fyuri o'rtasida revansh jangi bo'lib o'tadi.

SHu yilning may oyida Turki Al ash-SHayx boksning zamonaviy tarixida hech kim qila olmagan ishni amalga oshirdi. U "Qirollik" divizionida mutlaq jahon chempionligi uchun birinchi jangni tashkil qila oldi. Usik Entoni Joshuani ikki marta mag'lub etganidan so'ng, tashkil etilishi mumkin bo'lgan eng yaxshi jang Aleksandrning Tayson Fyuri bilan jangi ekanligi hammaga ayon edi. Britaniyalik o'ziga xos tarzda, Usikni internetda har tomonlama haqoratlab, jangni reklama qila boshladi. Asosiy muammo boks jamoalarining moliyaviy masalalar borasida til topisha olmagani edi. Fyuri o'sha paytdagi divizionning asosiy yulduzi sifatida, jang uchun gonorarni o'z foydasiga 70\30 foiz nisbatida taqsimlashni talab qildi.

Ammo Aleksandr bu kelishuvdan mamnun emas edi. Ukrainalik uch marta chempion bo'ldi va o'zini jang uchun jiddiy gonorar olishga loyiq deb hisobladi. SHuning uchun, juda uzoq vaqt davomida Usik va Fyuri umumiy foizlar masalasida kelisha olmadilar. Ammo saudiyalik shayxlar har ikki jamoaning talabini qondira olishdi. Fyuri umumiy to'lovning 70 foizini olishni xohladi - Tayson taxminan 65 million dollar hamda PPV (pullik translyaciya)ni hisobga olgan holda birinchi jang uchun taxminan 110 million dollar ishlab oldi; SHu bilan birga, Turki Al ash-SHayx ukrainalikni ham xafa qilmadi: ha, Usik britaniyaliklarga qaraganda ancha kam pul oldi, ammo bu juda katta summa edi - 40 million dollar! Qisqasi, Saudiya shayxlari ikkala bokschining ham qo'ynini yog'ga to'ldirdilar.

Revansh oldidan vaziyat o'zgardi, albatta. Usik Fyuridan WBC kamarini tortib oldi. Endi u divizionning asosiy yulduzi va to'lovlar Usik foydasiga hisoblanishi kerak. Bundan bitta pastki vaznda jang qilib yurgan ukrainalik bunday summani orzu ham qila olmasdi. Masalan, Murat Gassievga qarshi mutlaq chempionlik kamari uchun jang unga 1 million dollardan kam daromad keltirgandi. Balki, shuning uchun ham og'ir vazn toifasi "Qirollik" deb ataladi.

Tayson Fyuri va Aleksandr Usik o'rtasidagi revansh jangining umumiy jamg'armasi deyarli 200 million, aniqrog'i 191 million dollarni tashkil qiladi: bu Britaniyaning TalkSPORT nashri keltirgan summa. Tabiiyki, endi gonorar chempion foydasiga taqsimlanadi: 114 million dollar Usikka, 76 million dollar Fyuriga beriladi. Ukrainalik uchun bir nechta astronomik raqamlar: butun faoliyati davomida, Joshua bilan ikkita jang va Fyuri bilan birinchi jang uchun to'lovlarni hisobga olgan holda, u Tayson bilan revansh jangida oladiganidan biroz ko'proq pul ishlab oldi.

SHu bilan birga, Saudiya shayxlari britaniyalikni  ham etibordan chetda qoldirishmadi. Ha, 1-jangda Fyuri mag'lub bo'ldi, lekin bu juda yaqin jang bo'lgandi va u hali ham zamonaviy boksning katta yulduzi. 76 million dollar - bu juda katta summa, garchi birinchi jangdagidek ko'p bo'lmasa-da. Tayson yana hamyonini to'ldiradi va zamonamizning eng boy bokschilaridan biri ekanligini yana bir bor isbotlaydi.

Saudiya shayxlari boks sanoatini o'zgartirdilar. Endi boks yulduzlari haqiqatan ham katta gonorarlarni olishadi, lekin ayni paytda ular bir-biriga qarshi kurashadilar. Kuchli kuchli bilan uchrashadi, hech kim hech kimdan qochmaydi - muxlislar foyda ko'radi, sportchilar foyda ko'radi, umuman olganda hamma foydada bo'ladi.