Almatidagi Osiyo Kubogining birinchi kuni 13 ta medal qo'lga kiritdik, 5 tasi oltin!

Bugun start olgan qita ochiq kubogida mezbonlardan tashqari Rossiya, Qirg'iziston, Tojikiston va O'zbekistondan istedodli dzyudochilar tatamiga chiqishyapti. 

Quvonarlisi, musobaqaning birinchi kuni hamyurtlarimiz uchun omadli keldi. 

-50 kg vazn toifasidagi vakilimiz Bahrom Boturov barcha raqiblarini mag'lubiyatga uchratib, oltin medalni qo'lga kiritdi. Bahrom qozog'istonliklar - Sultan Baymirza, Janaris Raxmetkali, yarim finalda yana bir hamyurtimiz Temurbek Bobomurodov hamda hal qiluvchi final uchrashuvida mezbon dzyudochi Muhammad Sativaldini engib, shoxsupaning eng yuqori pog'onasiga ko'tarildi. Temurbek Bobomurodov va Sunnatillo To'xtaevlar bronza medaliga sazovor bo'lishdi. 

-60 kg vazndagi dzyudochimiz Azizbek Ortiqov ham Osiyo Kubogining oltin medaliga ega chiqdi. Azizbek qirg'izistonliklar - Alisher Arzikul uluu, Berador Kurmanbekov, qozog'istonlik Dauren Kayratuli, yarim finalda yana bir qirg'iz dzyudochisi CHingizxan Saginaliev va final bellashuvida mezbon sportchi Yikilas Alseytni engib, terma jamoamizga ikkinchi oltin medalni taqdim etdi. 

-90 kg vazn toifasida ham o'zbekistonlik sportchi sharafiga davlatimiz madhiyasi yangradi. Muhammadqodir Mansurov ushbu vaznda barcha raqiblaridan ustun ekanligini amalda isbotladi. U qozog'istonliklar - Nursultan Kablan, Akjol SHalkarov, qirg'izistonlik Anarbek Ishenbaev engdi. Final bahsida esa tatami egasi Rauan Najimxanovni mag'lubiyatga uchratdi va oltin medalni qo'lga kiritdi.   

+90 kg vazn toifasining final uchrashuvi ham hamyurtimiz ishtirokida kechdi. Lekin Qahramon Rahmonov oltin medal uchun bahsda qozog'istonlik raqibi Jurkamirza SHukurbekovga yutqazib qo'ydi va kumush medal bilan taqdirlandi. Ushbu vaznda ishtirok etgan yana bir vakilimiz Islombek Ravshanqulov bronza medali bilan yurtimizga qaytadigan bo'ldi. 

-66 kg vazndagi polvonimiz Jo'rabek Abdullaev Osiyo Kubogining kumush medaliga ega chiqdi. Yarim finalda rossiyalik Igor Yarovoydan ustun kelgan Jo'rabek oltin medal uchun bahsda qozog'istonlik Tayman Nurgalievga imkoniyatni boy berdi. 

-81 kg vazn toifasining kumush medali ham o'zbekistonlik dzyudochiga nasib etdi. Finalga qadar mag'lubiyatsiz etib kelgan Jahongir Mamatrahimov oltin medal uchun bahsda mezbon sportchi Aydar Arapovdan engildi.  

-55 kg vaznda yurtimiz sharafini himoya qilgan Sobirjon Karimov bronza medali bilan taqdirlandi. -73 kg vazndagi vakilimiz Sanjar Pardaev ham Osiyo Kubogining bronza medalini qo'lga kiritdi.  

Osiyo Kubogining qizlar o'rtasidagi bahslarida ham medalga ega bo'ldik. -40 kg vaznda Muhayyo Ahmatova, -57 kg vazn toifasida Farangiz Rejepova kumush medal sohibasiga aylanishdi.  

SHu tariqa, Cadet Asian Judo Cup Almaty musobaqasida Mo'min Nabiev, Sanjar Zokirov va Tohir Fayziev murabbiyligida ishtirok etgan O'zbekiston o'smirlar terma jamoasi 3 ta oltin, 5 ta kumush, 5 ta bronza, jami 13 ta medalni qo'lga kiritdi.