Andijonda yunon-rum kurashi bo'yicha xalqaro turnir o'tkazildi FOTOGALEREYA

Andijon Olimpiya va paralimpiya sport turlariga tayyorlash markazining yopiq arenasida tashkil etilgan mazkur musobaqada o'zbekistonlik kurashchi polvonlardan tashqari Qirg'iziston, Qozog'iston, Tojikiston va Rossiya davlatidan kelgan sportchilar gilamga chiqishdi. 

Musobaqaning ochilish marosimida Andijon viloyati yoshlar siyosati va sportni rivojlantirish bosh boshqarmasi boshlig'i O'tkirbek Toshpo'latov so'zga chiqib, Akmalxo'ja Rahimovni xotirladi va uning oila azolariga sportni rivojlantirish yo'lida qo'shayotgan xissasi uchun minnatdorchilik bildirgan xolda ishtirokchilarga omad tiladi.

SHundan so'ng katta monitor orqali musobaqa ishtirokchilariga Akmalxo'ja Rahimovning xotirasiga bag'ishlangan video rolik taqdim etilib, uning sportdagi faoliyati haqida qisqacha malumot berildi. 

Sport ustasi, milliy toifadagi hakam Akmalxo'ja Rahimov 1965 yil Andijon shaxrida tug'ilgan. Yoshligida boshqa tengqurlaridan farqli ravishda Akmalxo'ja sportning yunon-rum kurash turiga qiziqqan va 10 yoshidan ushbu yakkakurash turi bilan shug'ullana boshlagan. 

Kurashchi sifatida sobiq ittifoq davrida 1983 yil yoshlar o'rtasida spartakiada g'olibi, shuningdek bir necha karra O'zbekiston chempionati g'olibi sifatida ham etirof etilgan. Rossiyaning Omsk shahridagi oliygohda taxsil olib yurgan davrida ham sport bilan hamnafas bo'lib, bir nechta chempionatlarda sovrinli o'rinlarni qo'lga kiritgan.

1991 yil sportchilik faoliyatini yakunlab, malum muddat sog'ligini tiklash bilan band bo'lgan. 1996 yildan 2002 yilga qadar murabbiy sifatida ish olib borgan. O'tgan davr mobaynida  davomida 100 dan ortiq shogirdlarini etishtirib chiqargan. 

Madaminov Muhammadumar, Xoshimbekov Nurbek, Abdusalomov Hayitboy, Mamasoliev Abror kabi ko'plab kurashchi sportchilar aynan murabbiy Akmalxo'ja Rahimov qo'li ostida Osiyo va jahon chempionatlarida ishtirok etib, shohsupaga ko'tarilgan. 

Ochilish marosimi yakuniga etgach, tashkilotchilar mehmonlarni bir piyola choyga taklif qilishdi. G'olib va sovrindorlarga homiylar tomonidan smart televizor, changyutgich, maxsus medal, statuetka va diplomlar topshirildi.