Angrenda uch ming nafardan ziyod aholi sog'lom hayot uchun 5 000 qadam bosib o'tdi

Angren shahrida «Sog'lom hayot uchun 5000 qadam» shiori ostida ommaviy sport tadbiri tashkil etildi. Unda shahar hokimligi, IIB, Milliy gvardiya, DXX xodimlari, shahar jismoniy tarbiya va sport bo'limi, xalq talimi bo'limi, Angren shahar bolalar-o'smirlar sport maktabi, shuningdek harbiy qism xizmatchilari faol ishtirok etdi. 

Umuman olganda, mazkur tadbirda uch ming nafardan ziyod ko'ngillilar qatnashdi. Jismoniy va manaviy sog'lomlikning asosi bo'lgan bu kabi tadbirlar aholi orasida sog'lom turmush tarzini keng targ'ib qilishga qaratilganligi bilan ahamiyatlidir.

Loyiha doirasida «Milliy armiyamiz – jasorat maktabidir!» shiori ostida Toshkent harbiy okrugiga qarashli harbiy qism tomonidan zamonaviy qurol-aslaha va harbiy texnika ko'rgazmalari tashkil etildi.

Milliy armiyamizning jangovar texnikalari bilan birga zamonaviy qurol-aslahalari hamda harbiy xizmatchilarning qo'l jangi bo'yicha mashg'ulotlari va ko'rgazmali chiqishlari namoyish etildi.

Bayramona ruhda o'tgan marafon so'ngida CHirchiq garnizoni manaviyat va marifat markaziga qarashli ashula va raqs ansambli tomonidan ijro etilgan kuy-qo'shiqlar barchani xushnud etdi.