Armanistonlik Olimpiada sovrindori, jahon va Evropa chempioni Toshkentda + FOTO

Yunon-rum kurashi bo'yicha London-2012 Olimpidasi kumush medali sovrindori, jahon hamda Evropa chempionatlarining oltin, kumush va bronza medallari sohibi, Qozon Universiadasi vice-chempioni, armanistonlik afsonaviy kurashchi Aram Julfalakyan poytaxtimizda mehmon bo'lib turibdi. 

Etiborga molik jihati shundaki, Aram faoliyatidagi jahon chempionatining yagona oltin medalini aynan Toshkentda o'tgan dunyo birinchiligida qo'lga kiritgan. O'shanda u ozarbayjonlik Elvin Mursaliev (9:0), avstriyalik Florian Marxl (12:1), meksikalik Xuan Eskobar (11:2), gruziyalik Zurab Datunashvili (1:0) hamda hal qiluvchi final bellashuvida xorvatiyalik Neven Jugay (4:0)ni mag'lubiyatga uchratib, shoxsupaning eng yuqori pog'onasiga ko'tarilgan edi. Aynan Toshkentdagi jahon chempionatida yana bir tarixiy voqea ro'y bergan. Buni mavridi kelib qolgani uchun eslatib ketamiz. Jahon chempionati doirasida o'tkazilgan Kongressda FILA nomi Birlashgan kurash dunyosi (UWW)ga o'zgartirilgandi.     

Kecha Aram Julfalakyan poytaxtimizga tashrifi doirasida bir necha o'n yillardan beri terma jamoalarimizga istedodli kurashchilarni etkazib berib kelayotgan Respublika olimpiya zaxiralari kollejida bo'ldi. Armanistonlik afsona kollejning kurash zalida mashg'ulot o'tkazayotgan yosh erkin va yunon-rum kurashchilarimiz bilan uchrashib, ular bilan birga mashg'ulot ham o'tkazdi. Julfalakyanning mahorat saboqlarini yoshlarimiz katta ishtiyoq bilan qabul qilishdi va tabiiyki, mashg'ulot so'nggida suratga ham tushishdi.