Asian Judo Cup Almaty. Yoshlarimizda 5 ta medal, 2 tasi oltin, qizlarimizga tasanno!

Kecha qita ochiq kubogida yoshlar bahslarga kirishishdi. Musobaqada mezbonlardan tashqari Rossiya, Qirg'iziston, Tojikiston, Turkmaniston, Mo'g'uliston va O'zbekistondan istedodli dzyudochilar tatamiga chiqishdi. 

O'g'il bolalar -60, -66, -73, -81, -90, -100 +100, qizlar esa -48, -52, -57, -63, -70, -78 hamda +78 kg vazn toifalarida musobaqa medallari hamda reyting ochkolari uchun bahs olib borishdi.  

Musobaqaning so'nggi kuni qizlarimiz ancha faollik ko'rsatishdi. Terma jamoamizga taqdim etilgan ikkala oltin medal ham aynan ularga tegishli bo'ldi. Kimyo Marasulova va Rinata Ilmatova barcha raqiblaridan ustun kelishdi hamda ularning sharafiga O'zbekiston madhiyasi yangradi. 

SHoxsupaga ko'tarilgan dzyudochilarimiz:

-48 kg: Kimyo Marasulov (oltin)

+78 kg: Rinata Ilmatova (oltin)

-81 kg: Jaloliddin Qurbonmurodov (kumush)  

-90 kg: Sardor Hurramov (bronza)

-100 kg: CHingizxon SHokirov (bronza)

Umumjamoa hisobida O'zbekiston yoshlar terma jamoasi 2 ta oltin, 1 ta kumush, 2 ta bronza medali bilan Qozog'istondan so'ng ikkinchi o'rinni egalladi. Mezbonlar 8 ta oltin, 8 ta kumush, 16 ta bronza medalini qo'lga kiritishdi. Keyingi o'rinlarni Qirg'iziston, Rossiya, Mo'g'luliston terma jamoalari band etishdi. Bu jamoalar safida bir nafardan chempion bor.  

Eslatib o'tamiz, Osiyo kubogining birinchi kuni o'smirlar o'rtasida o'tkazilgan musobaqada O'zbekiston o'smirlar terma jamoasi 3 ta oltin, 5 ta kumush, 5 ta bronza, jami 13 ta medalni qo'lga kiritgan edi.