Australian Open. Daniil Medvedev engil g'alaba bilan boshladi

Avstraliya Ochiq chempionatining erkaklar o'rtasidagi bahslarida dunyoning sakkizinchi raketkasi Daniil Medvedev engil g'alabani qo'lga kiritdi. Rossiyalik tennischi ilk davrada reytingning 56-pog'onasida borayotgan amerikalik Markos Xironga uchtagina geym berdi xolos - 6/0, 6/1, 6/2. 

Tennischilarning o'zaro ikkinchi uchrashuvida ham Medvedev g'alaba nashidasini surdi. Bir soatu 37 daqiqa davom etgan bahsda Daniil 9 ta eys, 4 ta qo'shxato va 7 ta breykni rasmiylashtirdi. 

Endi Medvedev Avstraliya Ochiq chempionatining ikkinchi davrasida mezbonlar vakili Jon Millmanga qarshi kortga chiqadi. Avstraliyalik tennischi birinchi bosqichda shveycariyalik Mark-Andrea Xuslerdan besh set davom etgan uchrashuvda ustun keldi - 6/7(8), 7/5, 6/7(2), 6/2, 6/3.