Azizjon Kamilov Budapeshtda IJF prezidenti bilan uchrashdi

Uch kun davom etgan nufuzli musobaqada O'zbekiston terma jamoasi ham munosib ishtirok etdi. Dzyudochilarimiz yakunda 2 ta bronza medalini qo'lga kiritib, umumjamoa hisobida 80 ta davlat orasida 16-o'rinni band etishdi. 

Etiborlisi, Vengriya Gran-prisi doirasida O'zbekiston dzyudo federaciyasi prezidenti Azizjon Kamilov hamda Xalqaro dzyudo federaciyasi (IJF) prezidenti Marius Vizer o'rtasida navbatdagi uchrashuv ham bo'lib o'tdi. Ular shu yil BAAda o'tgan Osiyo chempionatida ham uchrashishgan edi. 

Bu galgi uchrashuvda janob Vizer mamlakatimiz dzyudochilarining xalqaro arenada erishayotgan muvaffaqiyati, yurtimiz mezbonlik qilayotgan nufuzli xalqaro musobaqalarning yuqori saviyada o'tkazilayotgani va bu bilan O'zbekiston dunyoda dzyudoning yanada ommalashuviga munosib xissa qo'shayotganini alohida etirof etdi. 

Malumki, Xalqaro dzyudo federaciyasi o'rta talim maktablarida ham dzyudoni fan sifatida o'tkazish bo'yicha maxsus dastur ishlab chiqqan. Unga ko'ra, bugungi kunda O'zbekistonda ham yigirmata maktab darsligiga dzyudo kiritilgan. Kelajakda bu son yana oshiriladi. Vizer uchrashuv chog'ida bu mavzu bo'yicha ham o'zining iliq fikrlarini bildirdi hamda O'zbekiston dzyudo federaciyasi yangi rahbar boshchiligida xalqaro munosabatlarda faol ishtirok etayotganini urg'uladi.   

Tabiiyki, o'zbekistonlik dzyudochilarning kelasi oy Tokioda o'tkaziladigan yilning eng nufuzli musobaqasi - Jahon chempionatiga ko'rayotgan hozirligi, poytaxtimiz mezbonligida o'tadigan Toshkent Gran-prisiga olib borilayotgan tayyorgarlik, hakamlar va murabbiylar uchun tashkil etiladigan turli xalqaro seminarlar hamda boshqa qator masalalar yuzasidan ham fikr almashildi. Kelajakda ham O'zbekiston va Xalqaro dzyudo federaciyasi o'rtasida keng ko'lamdagi hamkorlik davom ettirilishi takidlandi. 

Uchrashuv so'nggida Azizjon Kamilov Marius Vizerga esdalik sovg'asi topshirdi.