Azizjon Kamilov va Marius Vizer O'zbekiston dzyudosi istiqbolini muhokama qilishdi

Tokio Olimpiadasining muhim reyting ochkolari o'ynalgan yilning ushbu nufuzli musobaqasida O'zbekiston terma jamoasi ham munosib tarzda ishtirok etdi. Dzyudochilarimiz yakunda 1 ta oltin, 2 ta kumush, 2 ta bronza medalini qo'lga kiritib, Osiyo va Okeaniyaning 40 ishtirokchi davlati orasida 6-o'rinni band etishdi.

Bundan tashqari, O'zbekiston dzyudo federaciyasi rahbariyati Osiyo chempionati doirasida bir qator rasmiy uchrashuvlar ham o'tkazdi. Xususan, federaciya prezidenti Azizjon Kamilov Dubay shahrida BAA dzyudo, sport kurashlari hamda kikboksing federaciyalari prezidenti Muhammad Bin Talub Al Deriya bilan uchrashgan edi. 

Osiyo chempionati doirasidagi yana bir etiborga molik uchrashuv Fujayra shahrida Xalqaro dzyudo federaciyasi prezidenti Marius Vizer bilan bo'lib o'tdi. O'zaro suhbat chog'ida janob Vizer mamlakatimiz dzyudochilarining xalqaro arenada erishayotgan muvaffaqiyatlari, O'zbekiston mezbonlik qilayotgan nufuzli xalqaro musobaqalarning yuqori saviyada tashkil etilayotgani va bu bilan yurtimiz butunjahon dzyudo rivojiga munosib xissa qo'shib kelayotganini alohida etirof etdi.

Uchrashuv so'nggida kelajakda ham O'zbekiston va Xalqaro dzyudo federaciyasi o'rtasida keng ko'lamdagi hamkorlik davom ettirilishi takidlandi. Marius Vizer o'z so'zida O'zbekiston bemalol qita va jahon chempionatlarini o'tkaza olishini urg'uladi.