Bahodir Jalolov jahon chempionatidagi mezbonlik masuliyati, tayyorgarlik va asosiy raqiblar haqida gapirdi

"Tayyorgarlik yaxshi, yigitlarning kayfiyati alo darajada. Ukraina, Rossiya va Xorvatiyadan menga sparringlarda yordam berish uchun kuchli bokschilar olib kelindi. SHu bokschilar bilan yaxshi sparringlar o'tkazdik. Jahon chempionatida qo'limizdan kelgan ishni qilamiz, qolgani Allohdan. 

Masuliyat juda katta. Biz ko'proq medal olishimiz kerak, umumjamoa hisobida ham birinchi bo'lishimiz zarur. Bu bizni eng katta maqsadimiz. Biz faqat oltin medal uchun ringga chiqamiz. Boshqasi qiziqtirmaydi. Har bir vaznda kuchli bokschilarimiz bor. Har birimizda oltin medalni qo'lga kiritish imkoniyati mavjud. Biz yaxshi sport formasidamiz, lekin birinchi bo'lishimiz uchun avvalo ruhiy jihatdan tayyor bo'lishimiz kerak. Sportchi ajoyib formada bo'lsa ham, uning psixologiyasi tayyor bo'lmasa, hech narsa qila olmaydi, deb o'ylayman. 

Rossiya va qozog'istonlik bokschilar menga asosiy raqobatchi bo'lishi mumkin. Kuchli bokschilar ko'p, ayniqsa Evropada. Menga raqibning ahamiyati yo'q. Kim bilan bo'lsa ham Allohga tavakkal qilib ringga chiqamiz. 

Albatta, o'z uyingda devorlar ham yordam beradi, lekin masuliyat ham yuqori bo'ladi. CHunki o'z xalqimiz oldida jang qilamiz. Boks oson sport emas - bitta zarba hammasini hal qilib qo'yadi. Ehtiyotkorlik bilan ishlashimiz shart. Sababi, o'z uyimizdamiz. Ayniqsa menga - og'ir vaznda, ehtiyotkorlik muhim. Iloji boricha, turli taraflarga chalg'imasdan maqsadimiz sari to'g'ri yo'lda borishimiz kerak", - dedi Jalolov.