Bahodir Jalolovning navbatdagi raqibi kim? Bo'yi 2 metrdan baland, Pekin Olimpiadasi ishtirokchisi

U yangi promoshendagi ilk jangini Onoriode Evariemega qarshi o'tkazadi. 

Onoriode Evarieme 1987 yilda Nigeriya tug'ilgan. U boks bilan 9 yoshidan shug'ullanishni boshlagan. "Yashil burgut" havaskor boksda bir qator yaxshi natijalarga erishadi. Yurtida bir necha bor havaskorlar o'rtasida mamlakat chempioni bo'ladi. Uning havaskor boksdagi eng katta yutug'i Pekin Olimpiya o'yinlariga yo'llanmasi bo'lgan. Nigeriyalik bokschi 2007 yilda Afrika chempionatida ikkinchi o'rinni qo'lga kiritadi va Pekin-2008 yo'llanmasiga ega chiqadi. Xitoy poytaxtida bo'lib o'tgan yozgi Olimpiya o'yinlarida Onoriode Evarieme Yaroslav Yakshtoga qarshi ringga ko'tariladi va ilk raunddayoq imkoniyatni boy beradi. 

SHundan so'ng Onoriode Evarieme professional boksga o'tishga qaror qiladi. U professional boksdagi debyut jangini 2010 yilning dekabr oyida Jakartada o'tkazadi. Junior Maletino Yakopoga qarshi kechgan jangda raqibini ochkolar hisobiga ko'ra mag'lub etadi. SHundan so'ng Evarieme 10 ta jangini Afrika qitasida o'tkazib, raqiblarining barchasini mag'lub etadi. 

17 ta g'alabali seriyadan so'ng Onoriode ilk bor AQSHda jang qilish imkoniga ega bo'ladi. Biroq debyut omadsiz bo'ladi. Rodni Ernandesga qarshi kechgan jangda Onoriode faoliyatidagi ilk mag'lubiyatini qabul qilib oladi. Mag'lubiyatdan so'ng Onoriode ikkita jangda g'alaba qozondi va vakant bo'lib turgan WBA International kamari uchun ringga chiqish imkoniga ega bo'ldi.

U 2021 yilning fevralida Qozog'iston vakili Jan Kosobuckiyga qarshi ringga ko'tarildi, biroq kamar uchun kechgan jangning to'rttinchi raundida yana mag'lub bo'ldi. Onoriode Evarieme Bahodirga qarshi jangdan avvalgi ikkita jangini AQSHda o'tkazgan va har ikkisida g'alaba qozongan. 

Malumot uchun, Onoriode Evariemening bo'yi 2 metr 1 smni tashkil etadi. Ayni paytda nigeriyalik bokschining huquqlarini LPMG promousheni himoya qiladi.

Uning professional boksdagi rekordi 20-2ni tashkil qiladi. Nigeriyalik bokschi janglarining faqatgina bittasi to'liq davom etgan. Qolgan janglarda Onoriode yo o'zi nakaut qilgan, yoki o'zi nokaut bo'lgan.