Bahodir Jalolovning sobiq raqibi prof boksdagi 10-jangini o'tkazadi

Amerikalik 24 yoshli Torres 18 may kuni AQSHda o'zi singari mag'lubiyat nimaligini bilmay kelayotgan vatandoshi Brendon Murga (14-0, 8 KO) qarshi ringga ko'tariladi. Bu Torres uchun prof faoliyatidagi 10-jang bo'ladi. Richard barcha janglarini muddatidan avval yakunlagan.   

30 yoshli Mur ham hali mag'lubiyat va durang qayd etmagan. O'n to'rtta jangining 8 tasida raqiblarini nokautga uchratgan. Ikkala bokschi ham shu kungacha mag'lubiyatga uchramagan raqiblar bilan jang qilgan.

Malumot uchun, Torres-Mur jangi 18 may kuni Top Rank promouterlik kompaniyasi tomonidan San-Diego shahrida tashkil etiladi. Oqshomning markaziy jangi engil vazn toifasida vakant bo'lib turgan WBO chempionlik kamari uchun Emmanuel Navarrete hamda Denis Berinchik o'rtasida kechadi.

Qayd etish joiz, Bahodir Jalolov va Richard Torres havaskor boksda ikki bor to'qnash kelgan va har ikki jangda hamyurtimizning qo'li baland kelgan. Tokio-2020 Olimpiadasi finalida Jalolov Richard Torresni ochkolar hisobiga ko'ra mag'lubiyatga uchratgandi.