Bekzod Abdurahmonov 1/16 finalda Tokio Olimpiadasi chempioniga yutqazdi, lekin hali bronza va Parij-2024 chiptasi uchun umid bor

Kecha jahon chempionatining navbatdagi kuni erkin kurash bo'yicha bellashuvlar davom ettirildi. Hamyurtlarimizdan Javrail SHapiev bronza medali uchun bahsda yutqazgan bo'lsa-da, lekin yana bir uchrashuvda g'alaba qozongan holda Parij-2024 Olimpiadasi yo'llanmasini qo'lga kiritdi. 

Tokio Olimpiadasining bronza medali sohibi Bekzod Abdurahmonov -74 kg vazn toifasidagi bellashuvlarda ishtirok etdi. Asosiy tayyorgarlikni AQSHda olib borgan erkin kurashchimiz ilk bosqichda polshalik Kamil Ribichkini 12-1 hisobida mag'lub etdi. Ammo 1/16 finalda Tokio Olimpiadasi chempioni, ikki karra jahon chempioni, rossiyalik Zaurbek Sidakovga yutqazib qo'ydi. Sidakov finalga yo'l olgani bois, Abdurahmonovda bronza medali hamda Parij Olimpiadasi uchun imkoniyat saqlanib qoldi. Buning uchun u birinchi galda o'tish bahsida gruziyalik Avtandil Kenchadzeni mag'lub etishi lozim. 

Jahon chempionatining -57 kg vazn toifasida bahslarida yurtimiz sharafini Tokio Olimpiadasi ishtirokchisi G'ulomjon Abdullaev himoya qilmoqda. U ilk bosqichda SHri-Lanka kurashchisi Gayan Ekanayakani mag'lub (10-0) etdi. 1/8 finalda esa serbiyalik Stefan Michichga yutqazib (2-7) qo'ydi. Michich finalga yo'l olgani bois, Abdullaevda ham bronza medali hamda Parij Olimpiadasi uchun imkoniyat yuzaga keldi. Bugun G'ulomjon o'tish bahsida koreyalik Kim Guk Xeonga qarshi gilamga chiqadi.   

-92 kg vazndagi erkin kurashchimiz Rustam SHodiev birinchi davrada polshalik Mixal Yan Beilavskidan 10-2 hisobida ustun keldi. Ammo 1/8 finalda gruziyalik Miriani Maysuradzega imkoniyatni boy (0-10) berib qo'ydi va jahon chempionatidagi ishtirokini yakunladi. 1/2 finalda qozog'istonlik Rizabek Aytmuxanga yutqazgan Maysuradze bugun bronza medali uchun kurashadi.