Bekzod Abdurahmonov jahon chempionati sovrindori!

Quvonarlisi, -74 kg vazn toifasidagi bahslarda ishtirok etgan hamyurtimiz Bekzod Abdurahmonov bronza medalini qo'lga kiritdi. Garchi u ilk davrada gruziyalik raqibga mag'lub bo'lsa-da, keyinchalik bronza medali uchun kurash olib borish imkoniyati yuzaga keldi. 

Hamyurtimiz avvaliga Polsha, keyin esa Ozarbayjon vakillarini mag'lubiyatga uchratdi va bronza medali uchun gilamga chiqish huquqiga ega bo'ldi. Medal uchun bahsda turkiyalik Soner Demirtashni mag'lubiyatga uchratib, O'zbekiston hisobiga ushbu jahon chempionatidagi ilk medalni qo'shib qo'ydi.

Ushbu vazn toifasida rossiyalik Zaurbek Sidakov jahon chempioniga aylandi. U final uchrashuvida hamyurtimiz Bekzod Abdurahmonovni ilk davradayoq mag'lubiyatga uchratgan gruziyalik Avtandil Kenchadzeni taslim etdi. Ikkinchi bronza medali AQSH vakili Jordan Barrousga nasib etdi.